25‏/12‏/2015

هو احنا بنتجوز ليه؟!


هو احنا عاوزين إيه من الزواج؟
سؤال بيفرض نفسه على الشباب والبنات اليومين دول، في ظل أوضاع اجتماعية ومادية وثقافية مختلفة عن الزمن اللي اتجوز فيه أهاليهم.

-عشان جوزها يصرف عليها.
طيب ما هي ممكن تكون بتكسب أكتر منه. أو أهلها مش مخليينها عايزة حاجة.


-عشان واحدة تطبخ له وتراعيه وتشوف مصالحه.
طيب لو دخل الجيش أو سافر لوحده ح يعمل إيه يا حاجة؟!

-عشان تبقى في حماية راجل.
على فكرة رجالة كتير زوجاتهم أقوى منهم جسديا، ولو قامت خناقة هي اللي ممكن تحميه.

-عشان يكمل نص دينه.
دينه ذات نفسه بيقول إن الزواج سنة وليس فريضة. (وساعات مكروه وساعات حرام)

-عشان تبقى أم.
إفرض ما خلفتش؟!

-عشان كل بنت مسيرها للجواز
ومسيرها للطلاق لو مش عارفة بتتجوز ليه.
يعني انت عمال تسددها في وش أهالينا .. طب جاوب انت يا فلحوس !!
الإجابة ببساطة من كتاب الله "السكن"
"وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجاً لِّتَسْكُنُوۤاْ إِلَيْهَا"
الزواج سكن .. فطرة ربنا إن كل واحد يفضل يلف ويدور عشان يلاقي سكن روحه زي ما بيدور على سكن لجسمه. وزي ما السكن بنحتمي به من الحر والبرد والإزعاج والتطفل، برضو سكن الروح لازم يكون راحة وأمان وسكينة ودفا.

وفي السكن كل واحد بينام على الجنب اللي يريحه. فيه ناس ما تسكنش غير في كمباوند .. وناس تحب الأحياء الشعبية والزيطة.. وناس لو خرجت من العشوائيات تموت.
برضو فيه ناس سكن روحها "واحد قوي يحميها" أو "حنونة تطبطب عليه" أو "واحد يشوفها جميلة" أو "واحدة تقبل عيوبه" أو "غني يصرف عليها ببذخ" أو "مجنونة تشاكسه" أو "مفكر يحاورها" أو "واحدة تحسسه بضعفها قدامه" أو "واحد يرحم ضعفها" أو "واحدة تهتم به كأمه" أو "واحد يعاملها كطفلة" أو "واحد تشاركه أحلامه" أو "واحد يحقق لها أحلامها" أو "واحدة تلغوص في الأكل قدامه" أو "واحدة يتفتف وهو بيكلمها عادي" .. أو .. أو .. أو ...
وكل فولة ولها كيال .. وكل واحد ينام ع الجنب اللي يريحه.

عشان كده كتير بنشوف "أزواج" بنستغرب تركيبتهم، بينما همه في غاية التوافق والسعادة.. السكن.
وعشان كده برضو مش صدفة إن عكس حروف الكلمة تكون "ن ك س" بما فيها من معاني الضعف والعجز والانكسار والتعاسة.
زي ما بتدور وتفكر وتجتهد وتختار سكن لجسمك .. دوّر كمان على سكن روحك.
ولو ما لقيتهوش إياك تعتبها.
عشان ما تتطربقش على دماغك ودماغ اللي جابوك
قشطة؟
--
"وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِقَوْمٍ يَتَفَكَّرُونَ"
لو تأملت الآية الكريمة ح تكتشف 3 حاجات:
1.     ربنا سبحانه يعد هذه العلاقة من الآيات والمعجزات.
2.     قدم الله هذه الآية (المعجزة) على معجزة خلق السموات والأرض.
3.     هذه العلاقة –حسب الآية الكريمة- تستوجب التفكر والتدبر فيها .. "لقوم يتفكرون"

هناك تعليقان (2):

  1. جميل المقال
    بس زي بيبقي ضروري تنقي السكن كويس وتنقي الجيران اللي هما بيبقو قرايب الزوجة لو السكن جميل في حد ذاته فده كويس ولكن الاجمل ان يناسبني
    زي انه قريب من االمدارس او الشغل وهكذا الزوجة ممكن تبقي رائعة بس لحد غيري
    فسبحان من استخدم السكن في توصيف الزواج وجل وعلا

    ردحذف