11‏/11‏/2012

فوتوشوب


يئست خلاص؟!
خد الصورة
وع البرنامج افتحها

ده حل بسيط
شوية نور
بلمسة اتنين نفتّحها


غير ملامح نظرتك
علشان تبان في الزوم جرئ
ف الجنب بهتانة السكك
ارسم طريق غير الطريق

افتح شفايفك حبتين
خف القيود فوق الإيدين
عَلّى الجبين
لأ .. حبتين
ارفع كمان.. مالك بطئ !!

خلصت خلاص؟
لسه الرتوش

ارسم وراك ناس شبعانين
ارسم نهار في عيون صبي
خف التباين حبتين
درّج كمان لجل النبي

خلي الفوارق تختفي
خضّر لحد ما نكتفي
خضّر كمان
املا المكان
واطبع لي كام مليون "كُوبي"

خلصت خلاص؟
سيّف بقى
محروق جهاز
هنجت ليه؟

قال إيه .. "إطار غير منطقي" !!
"يا تدوس Edit"
يا اقفل عليه

هناك 3 تعليقات: