25‏/03‏/2015

مين طفا النور؟ّ



الضلمة مهياش نور مقطوع

تلاجة ومكوى وتلفزيون
الضلمة دي ظلم وقهر وجوع
ناس واقفة تبيع على ناس بتخون

الظلم ضلام
والضلمة دي غش
ووعود وكلام
ما بيتنفذش
ومعارضة فشوش ودقون عيرة
وفساد ممنوع ييجي ف سيرة

وشباب مسجون من غير أوراق
وشيوخ المنصر ف بيوتها
وأمل كداب بيبيع ترياق
فقرا بتتصدق من قوتها

وكلام معسول .. رغي وتلزيق
إعلام طباخ .. هرى وتزويق

مش وقت كلام
ولا قولة "أي"
خليك قمور
دورك أهو جاي

وحزام مشدود
على عود مهدود
"أديك إزاي من لحم الحي؟"

ممنوع.
محظور.
بعدين.
بالدور.

مش في الدستور
ولا في القرآن
ولا في الإنجيل
ولا أي قانون

طلع الموضوع مش نور مقطوع
مش مكوى ودش وتلفزيون

هناك تعليق واحد: